Արդյո՞ք հայերը վիրահատում են իրենց հետույքը:

Հայաստանում պլաստիկ վիրահատությունները վաղուց արդեն սովորական երևույթ են դարձել։ Այսօր «հայկական քթից» հեշտությամբ հրաժարվում են ոչ միայն կանայք, այլև մարդկության արական կեսի ներկայացուցիչները։

Հայաստանում պլաստիկ վիրահատությունների մասին Slaq.am լրատվական ռեսուրսի լրագրողը զրուցում է էսթետիկ պլաստիկ վիրաբուժության ծառայության ղեկավար Գևորգ Յուրիի Եղիազարյանի հետ։

— Ո՞ր տարիքային խմբի ներկայացուցիչներն են դիմում պլաստիկ վիրահատության օգնությանը:

— Մեզ հիմնականում դիմում են 18-30 տարեկան կանայք։

— Լինո՞ւմ են դեպքեր, երբ մերժում եք պացիենտներին վիրահատել:

— Շատ հաճախ։ Երբ տեսնում եմ, որ պացիենտի ցանկությունները հնարավոր չէ իրականացնել, միանշանակ մերժում եմ։

— Հիմա շատերը նայում են որևէ հայտնի անձնավորության լուսանկարների և փորձում են նրա արտաքինը կրկնօրինակել իրենց վրա։ Ո՞ր աստղին են մարդիկ ամենից հաճախ փորձում նմանվել:

— Կարող եմ ասել, որ այս պահին ամեն ինչ տեղի է ունենում ճիշտ հակառակը։ Ինչ-որ մեկի պատճենը դառնալու փոխարեն, ընդհակառակը, ողջունվում է առավելագույնս բնական արդյունքը, և նորաձևության հետևից վազք չկա։

— Բացի քթի պլաստիկայից, ուրիշ ո՞ր պլաստիկ վիրահատություններն են առավել տարածված:

— Ամենատարածված վիրահատությունը ռինոպլաստիկան է։ Այն կազմում է բոլոր վիրահատությունների մոտ 90%-ը։ Մնացած 10%-ը զբաղեցնում են մյուս բոլոր պլաստիկ վիրահատությունները, օրինակ՝ կրծքի, որովայնի պլաստիկան և այլն։

— Ճի՞շտ է, որ պլաստիկ վիրահատության դեպքում շատ կարևոր է սեզոնային գործոնը:

— Ամենևին ոչ։ Վիրահատությունից հետո առաջին շաբաթվա ընթացքում պացիենտը պետք է մնա տանը, որտեղ ամբողջ տարվա ընթացքում միշտ պահպանվում է միջին ջերմաստիճան, ուստի տարվա եղանակն այստեղ բացարձակապես նշանակություն չունի։ Ես ունեցել եմ պացիենտներ Սիբիրից, ովքեր վիրահատությունից հետո վերադարձել են տուն, որտեղ այդ պահին -30 աստիճան էր, կապվել են ինձ հետ և ասել, որ ոչ մի խնդիր չունեն։

— Ինչպիսի՞ գնային քաղաքականություն է գործում Ձեզ մոտ:

— Քթի պլաստիկայի արժեքն այս պահին մեզ մոտ կազմում է 550 հազար դրամ։ Մամոպլաստիկան ավելի թանկ արժե՝ կապված սիլիկոնե իմպլանտների բարձր ինքնարժեքի հետ, և ընդհանուր առմամբ կազմում է մոտ 2500-3000 դոլար։ Ներարկումների միջոցով շուրթերի մեծացումը կարժենա 100-150 հազար դրամ։

— Ձեզ դիմո՞ւմ են հետույքի պլաստիկայի հարցով:

— Ո՛չ։ Նման վիրահատությունները շատ տարածված են լողափնյա երկրներում։ Հայաստանում նման խնդիրներով ինձ չեն դիմել։

— Ինչպե՞ս եք Դուք, որպես տղամարդ, վերաբերվում պլաստիկ վիրահատություններին:

— Դրական, քանի որ կարծում եմ, որ ճիշտ կատարված վիրահատությունն ամենևին չպետք է ուշադրություն գրավի։ Իսկ եթե ոչինչ չի երևում, ինչո՞ւ ոչ։

— Ի՞նչ խորհուրդ կտաք այն աղջիկներին, ովքեր դառնում են նորաձևության միտումների զոհ և դիմում պլաստիկ վիրաբույժի:

— Ես ոչինչ չեմ կարող խորհուրդ տալ այս դեպքում, միայն մաղթել, որ հանդիպեն ճիշտ վիրաբույժի, ով կփորձի համոզել նրանց, որ դա անհրաժեշտ չէ։ Իմ ընդունելությանը եկած ցանկացած պացիենտի ես փորձում եմ համոզել չդիմել վիրահատության։ Եթե պացիենտը համոզված է իր որոշման ճշմարտացիության մեջ և հստակ գիտի, թե ինչ արդյունք է ուզում ստանալ, միայն այդ դեպքում եմ վիրահատում։

Սատինե Թադևոսյան, Slaq.am — լրատվական ռեսուրս