Ծանոթություն և հիմնական գանգատներ
Խորհրդատվության էր եկել մի հմայիչ աղջիկ՝ դեմքի ներդաշնակ գծեր ձեռք բերելու և, որ պակաս կարևոր չէ, ազատ շնչելու հնարավորությունը վերականգնելու ցանկությամբ։ Դիմելու գլխավոր պատճառը քթի արտահայտված ասիմետրիան էր, որը ոչ միայն խաթարում էր ընդհանուր էսթետիկան, այլև պացիենտին ամենօրյա անհանգստություն էր պատճառում։
Նախնական անատոմիական պատկերը
Առաջնային զննման ժամանակ ես մանրամասն ուսումնասիրեցի նախնական անատոմիական առանձնահատկությունները։ Նախ, աչքի էր զարնում քթի առանցքի և քթի միջնապատի արտահայտված ծռվածությունը. հենց դա էր առաջացնում քթանցքերի ուժեղ ասիմետրիա և, որպես հետևանք, լուրջ դժվարություններ քթային շնչառության հետ։ Երկրորդ՝ պրոֆիլի վերլուծության ժամանակ ես նկատեցի սապատի առկայություն և փոքր-ինչ իջած, լայնացած քթի ծայրը, ինչը վիզուալ ծանրացնում էր դեմքը։ Ինձ համար լրացուցիչ մարտահրավեր էր պացիենտի հաստ, ծակոտկեն մաշկը։ Նման նախնական տվյալները վիրաբույժից միշտ առանձնահատկորեն բծախնդիր աշխատանք են պահանջում, քանի որ հաստ մաշկային ծածկույթի տակ շատ ավելի դժվար է գծագրել նոր ծայրի նրբագեղ ու բարակ գծերը։
Վիրահատության ընթացքը և վիրաբուժական նրբությունները
Ֆունկցիոնալ և էսթետիկ խնդիրները համալիր կերպով լուծելու համար ես կատարեցի բաց հիբրիդային ռինոսեպտոպլաստիկա։ Դա ծավալուն և ակնագործական ճշգրտության գործընթաց էր։ Առաջին հերթին ես կատարեցի սեպտոպլաստիկա՝ ուղղեցի միջնապատը, որպեսզի վերականգնեմ լիարժեք օդային հոսքը և ապահովեմ արտաքին քթի ճիշտ կենտրոնական առանցքը։ Հաշվի առնելով մաշկի հաստությունը՝ ինձ անհրաժեհտ էր ստեղծել ամուր և կայուն աճառային կմախք։ Ես զգուշորեն հեռացրեցի սապատը՝ նվազեցնելով քթի մեջքի պրոյեկցիան, և ռոտացիայի ենթարկեցի քթի ծայրը դեպի վեր՝ հաղորդելով դրան կառուցվածքայնություն և ճիշտ հենարան։
Արդյունքը՝ ներդաշնակություն և ֆունկցիոնալություն
Աշխատանքի արդյունքն ինքնին խոսուն է։ Պացիենտի դեմքն ակնթարթորեն կերպարանափոխվեց՝ անհետացավ ծանրությունը, հայացքն ավելի բաց դարձավ, իսկ գծերը ձեռք բերեցին փափկություն ու նրբություն։ Մենք ստացանք կատարելապես ուղիղ, էսթետիկորեն հստակ քթի մեջք՝ դեպի խնամված ծայրը սահուն անցումով։ Ասիմետրիան ամբողջությամբ վերացված է. այժմ քթանցքերի համաչափությունները ներդաշնակ են։ Եվ այս վիրահատության ամենագլխավոր ձեռքբերումը՝ իմ պացիենտը ոչ միայն հայելու մեջ հիանում է իր նոր, նրբագեղ պրոֆիլով, այլև վերջապես կարող է շնչել լիաթոք։
